3S3T

3S3T(Seejiq Truku, Seediq Tgdaya, Sediq Toda)

3S3T ksun ga niqan dha kari, kingal o kiya ka “Seejiq/Seediq/Sediq” tru klgan hnang nii. Manu ka kingal kari o kiya ka “Truku/Tgdaya/Toda” tru nniqan alang. Kiya ka klaun ta kana “Seejiq balay” nii. Yasa niqan ta tru klgan nniqan alang, niqan tru klgan kari, kika asi ksi “3S3T” da.

“3S3T” nii ga kiya ka Seejiq nTruku, Seediq nTgdaya ni Sediq nToda.Ida mnniq pusu daya yayung Mtudu kana han, saw ka alang Paran bitaq alang Truku sayang. Ini yahi qmlahang Tanah Tunux sbiyaw ka Taywan han o, tna niqan tru klgan ka nniqan alang da. “3S3T” ksun ga niqan nanaq hnang kari, ida mtduwa pprngaw han. Ida niqan cikuh ka ini pntna kari uri wah.

3T nii ga pniyah nniqan dxgal, kika thnganan tru hangan, ida klaun bi kana ita Seejiq/Seediq/Sediq ka hangan nii. Qtaan ta sayang ka tnhjilan Seejiq/Seediq/Sediq o ida wada bsiyaq bi ni wada knteetu thjil, paah breenux dhuq dgiyaq baraw, bitaq saw tru knlabang nniqan sayang.

Mnniq kiyig dgiyaq daya Paran saying na sejiqun o Tgdaya ksun dha, yasa thnganan “daya”, kika gaga mniq hini na seejiq o asi ksi “Tgdaya” uxay uri o “Seediq Tgdaya” da.

Manu ka gaga mniq breenux cikuh na ddgiyaq, uxay uri o sduman ddgiyaq (dealang Truwan, Sadu, Busig, Brayaw dhiya.... Jnaysyang hcwocen sayang), kndadax dhiyaq qmita o saw bi kngkingal mrijil ddgiyaq qtaan, “ruku” ksun ka mrijil ddgiyaq sduman dxgal. kiya ni sejiqun mniq hini ga asi ksi “Seejiq Truku” da.

Niqan ka kingal qpringan sejiqun o pklug gaga mniq kska bi qpringan Tgdaya ni qpringan Truku(dealang Toda, Rukudaya dhiya.... Jnaysyang cingingcen sayang).Bukuy dha sdalih bi dowras paru(ayug pusu yayung Mtudu saying),dhiya ga asi ka muda brah nniqan qpringan Tgdaya ni qpringan Truku, uxay uri o qulung ddaun qpringan Tgdaya ni qpringan Truku. Uxay uri o musa thjil kiyig sduman kgeayug uxy uri o deisil nniqan. Saw nii mthjil kdeinu, kiya ni Sejiqun ga thnganan dha “muda”, “tneuda” ka mnuda brah, uxay uri o qulung ddau dxgal. Uxay uri o knteetu thjil ini tnkingal nniqan sejiqun ga asi ksi “Teuda” ka qnpringan nii, Kika ksun “Sediq Toda” sayang da.

Yabi wada hari rima kbkuy hngkwasan do, kana ka qnpringan Sejiqun o wada niqan nanaq bnsyaqan nniqan alang ni saan dha rmigaw miing skeudus dha uri. Saying dga wada niqan tru qnpringan da, wada niqan nanaq ka kndsan uxay uri o euda klealang uri da. Ana saw hnang kari ga niqan ka ini ktna uri, ida ta pspruun qmita kana, ida ta mppsluhay uri.

Klgaan Sejiqun ga pusu bi han o paah kingal tnsapah, tnhuway saw kingal dara, kingal lutuc ni dhuq klgaan Sejiqun hici. Manu kai ta Seejiq/Seediq/Sediq ga, prajing bi kndusan o ida paah kingal tnsapah, kingal dara. Ana nanaq wada thjil deinu o ida saw nii uri, saw ka wada hraan hidaw Hwareyn(Karenko) o ida saw nii uri, mseupu dha aka kingal tnsapah, kingal dara, uxay uri o kana ka dadal thjil.

Pnyahan pnatas(參考資料)

許端容，2007，《台灣花蓮賽德克族民間故事》，臺北：中國口傳文學學會。