Alang mu dgiyaq(Truku)

Alang mu dgiyaq(Truku)

Alang mu gaga dgiyaq. Alang mu gaga siyaw bbaraw yayung. Alang mu, niqan hbaraw seejiq, niqan egu sapah uri.Malu balay qtaan,malu balay niqan uri. Alang Seejiq Truku ka Alang mu, kiya ni niqan hbaraw bi Seejiq Truku gaga mseupu mniq alang hini.Rmngaw ka tama mu rudan“uxay hini ka alang rudan ta sbiyaw, pnaah ta alang Truku miyah ta thjil alang hini sayang,wada niqan maspac kmxalan tru hari knkawas ka nniqan ta hini ”mnsa. Seejiq Alang o mdrumuc balay qmpah kana, yasa niqan bgurah dxgal, kiya ni hmuma ana manu o miyah bi kana, saw ka Payay dagun, wana ita hini meiyah payay tbula, basaw, masu, bunga, sari, sqmu, sama, risah, bnuwar, qlupas, apu rungay, qlahi…. tduwa malu kana ka hru dha,miya bi kana o.

Kiya ni sayang ana ima miyah kmbaruh dxgal hmuma beluh, tomato, usik empajiq, klgan sama ni ojiya,brigun dha ni priyuhun dha pila. Saw nii pnaah isil alang seejiq gaga mniq alang sayang o wada hbaraw balay da. alang nami gaga priqan ddgiyaq, sbiyaw uxay alang han o bbuyu qhuni harung kana han, kiya ka sun dha“alang bbuyu qhuni harung”ka alang hini. Qhuni harung niqan dha klgan , kingal o harung balay, kingal o harung trabus, qhuni harung balay sun malu bi stahu puniq, qhuni harung trabus o malu bi phyugun sapah, suxal o prajil thjil hini ka rudan ta sbiyaw , harung trabus ka wada malu bi phyugan ssapah, yasa mkray bi ka qhuni trabus ini krijil.

Brah alang niqan bbaraw bi yayung, mnsa ka bubu mu rudan“sbiyaw o musa ku mahu lukus yayung kdjiyax, panun mu brunguy ka lukus rutaq ni saan mu mahu yayung, nhdu mahu do panun mu brunguy duri ni saan mu mhidaw nganguc sapah. Nasi rbagan do, musa nami tmapaq qsiya yayung,musa nami qmraq qsurux ni kmarang ni qbowlung yayung uri, saw nii malu bi saan ka yayung alang mu dgiyaq. Nasi qmuyux paru do saw bi uxay hiya da, madas rngsux ni mruciq qsiya, mapa btunux ni qhuni saw bi muutux dni ktayun na kana ka qnpahan seejiq ni hakaw, saw bi smeisug.” Alang dgiyaq sayang saan balay rmigaw seejiq pnaah isil alang, yasa niqan nanaq malu bi gaya ka“seejiq tnpusu Taywan”hini, niqan malu bi sknxun bgihur ni bgurah balay ka qsiya mahun uri. Sayang gaga ta kmbiyax smluhay kari ta nanaq ni smluhay endaan rudan ta sbiyaw, saw ka tminun pala, smalu grig ni uyas Seejiq, niqan balay ririh dha kana. Pusu balay o malu bi lnglungan kana ka seejiq alang mu dgiyaq.