Baso
Baso/ Basaw/ Basaw(稷)
smmalu patasKndalax cbeyo, paru riyung ka Gaya baso daha ka macu nii. / Niqan kesun daha ka “Gaya tmukuy” daha ka “Gaya mehu”. Gino bale baso daha ka macu ka smalu Gaya nii.
Alang Tgdaya, Toda, Truku nii, niqan pnkingan kesun daha qbsuran mlutuc smalu Gaya nii. Ya ani Kingal knkawas idas 2 ka prading kesun daha smalu Gaya tmukuy macu ma baso, mhada ka pnhumaan macu daha ka baso de yaani dehuk hari idas 6-7, smalu kesun Gaya mehu denu.
Gaya nii, gaya paru, asi naq ka mhedu smalu Gaya nii de, kiya ka mosa tmukuy, mosa kmetuy ka kana alang seediq, ini osa smalu Gaya nana de, ini bale osa meepah ka seediq.
Thiyung daha riyung ka rudan smalu Gaya nii duri, ini ksengi ma, ini prngangi ani mmaanu kari naqah mesa, anu paru riyung ka beyax na. Kunguun daha maha ini kmalu ka pnuhuma daha mesa. Smalu Gaya nii ciida, ini bale psqama kana seediq alang duri, mseyang kana rudan denu, ye mesa maha thedu mdengu ini kparu ka pnhuma denu, kiya ka puyaun daha riyung ka Gaya nii.