Bling Utux(鬼火洞)

Ma ksun “Bling Utux” ka hini hug? Yaasa qntaan seejiq Alang Pulan wada mtucing hiya ka puniq utux, kiya ka asi dha thngani “Bling Utux” da. Manu ka ssiyaw niya dxgal o wada dha asi thngani “Bling Utux” kana uri da.

Ma ksun “Bling Utux” hug? Yaasa ayug ka hiya, niqan qsiya kiya ka mrusaw ka dxgal, ida smkila mhru bi hiya ka bbtakan uri, kiya ni maku mkuug qtaan. Yaasa niqan qsiya kiya ka saan qmpah ni mniq sjiqan ka ssiyaw dxgal hiya.

Smnrun ka rudan alang seuxal o, babaw tnehjil alang daya ka seejiq Pulan do yasa wada ini baka ka Tanah Tunux da, priyux kwo-min ceng-fu ka meiyah kmlawa Taywan. Yabi hngkawas 40 hari do, yaasa iyux qmpah, iyux peuyas patas lqian, kiya ni kghak musa miying malu dxgal qpahun, miying malu nniqan. Yaabi niqan 3-4 hari tnsapah meiyah thjil “Bling Utux” hini. Kiya ni prajing phiyug sapah qhuni dungan, gmbgurah dxgal hmuma gmhiyi, saw ka qhuni risah dnii sbariq alalng isil: kmdrux dxgal ksbreenux dxgal shuma qusul ni hmuma masu, bunga dnii. Bukuy do maa “Alang Bling Utux” ka hini da.

Duma seejiq o mnuda thjil Alang Tnglangan, Alang Sipaw dnii, ida kingal dara kiya wada seupu phiyug sapah hiya. Yaabi min-kwo 45 hngkawas bitaq 47 hngkawas do, gaga kghak ssiyaw qnpahan na sjiqan o ida kmdudul thjil alang sayang Hanabay kana da ka seejiq Pulan. Ana nanaq “Alang Bling Utux”, “Alang Tnglangan”.

Smnrun ka rudan alang seuxal o, manu ka puniq utux nii ga, ida ini lxani qmita ka puniq utux ksun, ida madas naqih utux ka hiya msa. Nasi wada qtaan mtucing dnamux sapah seejiq do, musa mangal naqih utux ka tnsapah gaga. Saw ka musa niqan kingal qbubur ka mangal narux paru, uxay uri o musa meydang kingal hiyi ka tnsapah hiya. Kiya ni ksugun balay qmita seejiq alang ka puniq utux nii.

Kiya ni seejiq “Alang Pulan” ksun ga, ida mn3 thjil nniqan kana, Hangan“Pulan” nii ga, ida mnegay seejiq “Alang Truku” ka hangan nii. Yaasa unganc gqiyaq ka “Alang Truku”, kiya ni ini phuma payay, kiya ni thnganan dha kui bulang mkan payay ka seejiq meiyah thjil “Alang Pulan” hini da. Ana nanaq bitaq sayang o ida tmhangan nanaq “Alang Pulan” ka seejiq alang hini.