Bnuhun nSeediq

Kari pnyahan pusu rudan ta ita Seediq ge “Bnuhun” kesun daha. Cbeyo bale, mneniq cceka dgiyaq ka kingal qhuni paru riyung, hnyegan qhuni kiya we, mgqhuni ka icin na ma, mgbtunux ka icin na, so hari kingal naq qtaan. Niqan kingal ali, psperuq pusu qhuni hiya ka kingal laqi rseno ma kingal laqi mqedin, paru de msterung ka dheya daha nii. Tuting ka laqi daha de, mrana kndalax ciida ka ita Seediq ma betaq saya. So nii ka kari pnsltudan rudan ta. Niqan ka kari daha so nii duri,“bnrahan ba smmalu ka karac ma dheran nii ciida, niqan ka kingal utux rseno daka kingal utux mqedin, peeyah karac baro meyah mtuting cceka dgiyaq paru bobo dheran hini, niqan kingal btunux paru ka bobo dgiyaq kiya. Kiya, mtgdaha mceka ka btunux kiya, icin na ge mtlangan bobo dheran, icin na ge sapah thulang. Daha utux nii we meniq cceka sapah thulang ka dheya ma, tnyanun daha mesa Bnuhun, kiya ka pnspreqan pusu ta ba rudan. Pusu Qhuni ma Pusu Btunux kesun daha duri. Mrana ta kndalax ciida ka ita Seediq di”mesa. “Pusu Qhuni”nii we, ga meniq pusu yayung kesun daha Gelu saya, dheran alang Tmunan Tlwaun Bsuring ka saya di, Peeyah bobo rcilung ge mpusan mmsepac kbekuy maxal sepac (2,814) meta ka knbrawan snpegan na dgiyaq kiya. Meniq ka Btunux Utux （sapah thuang）kiya ge maha kingal kbekuy meta ka snpegan knbrawan na, knlbangan na ge maha mmteru kmxalan meta. So bale ka kingal btunux qrari mbhege ga asi tgeqi cenga dgiyaq. Speeyah berah ma baang na qmita we, mtumun ma mbhege ka hnyegan na, speeyah hreyan hido qmita de, ga mllutuc dgiyaq mmaku paru. Quri gqiyan hido we kdere paru ka kiya, wano bukuy na ma baang na quri irin ka mmaku paru so msbale. Niqan lhengo paru ka pusu na, maha baka tqiyan rima seediq, kssiyo lhengo we maha baka tqiyan maxal sngari hei seediq. Ani si ini slhelah mhurah ma mtuting bilaq btunux ka lhengo truma, uxe kesun malu ba nniqan. Ga hreyan qhuni ma speriq ka ludux na baro, ga sqeya jyuzika daka patis Utux Baro ka so pusu na, pnsaan singhu daka seediq mnosa smnegul hii cuuxan mesa kari daha. Ado pusu bale pnyahan rudan ta ita Seediq ka Bnuhun nii ma, hntiyan daha tmngayan. Gaya ta ita Seediq we, spruun ta ba qmita ka utux rudan ta. Sapah utux rudan ta ka nii ma, tnyanan daha mesa“Pusu Btunux”ma “Pusu Qhuni”, spruun daha qmita ma naglan daha utux qmita. Ini mhemuc rmengo kari naqah ma kanna kari smeeliq rmengo, asi ka mlmelux lmngelung , smparu, mseesu ma sbleqan qmita. Lhengo utux rudan nii we ini mhmeti tmiyu, netun stiyu, uxe de smeeliq rmengo, smiicu ma sbgihur paru, qmuyux ma mbruwa denu. Uxe kiya de pknarux ta ma mooda ta pqraqil knseengan Utux, so nii ka seediq mosa phuling hiya duri. Saya de ini bhangi ka so nii di, Plmukan ka qmita btunux nii we “Btunux Bhege”,“Btunux Kuwan-In”,“Btunux Mutan”kesun daha tmngayan .“Bnuhun”,“Pusu Btunux”“Pusu Qhuni”mesa ta tmngayan ka ita Seediq.“Pusu Qhuni”nii ge pusu pnyahan rudan ta, so nii ka kari pnsltudan rudan ta cbeyo.