Bnuhur Sediq

Nkari pnyahana pusu rudan Sejiq u sun dha“Bnnuhur”,“cbiyaw

bay,mnniq cka dwiyaq ka kingal deyhing bay qhuni.hnyuwan qhuni nii u,cmka u mtna qhuni,cmka u mtna btunux.Saw kingal nanaq qtaan.Niqan kingal diyax,criyu kndadah kcka qhuni hiya ka utux kingal snaw mi kingal qridil,kiya sediq ni mstrung da.Ptuting laqi mi mrana piyah hiyaka hiyi ta sediq dhaq sayang.Saw nii ka pnyahan pusu rudan ta”emca ka nkari rudan ta cbiyaw.

Mnrngaw ka duma sediq uri,“prading bay smnalu karac ni dxgal ciida,

niqan kingal snaw mi qridil ka utux sun, kndadah baraw mi miyah mtuting kcka dwiyaq deyhing. Niqan ka sun deyhing bay btunux, babaw na. Kiya mi mtdha ka btunux nii da.icil u kiya mlangan babaw dxral, icil u kiya hay malu bay kingal sapah bukun.dha utux nii u mniq kcka sapah bukun ka dhiya mi thnganan dha Bnahur(kiya ka dxral pusu rudan~Pusu qhuni mi Pusu btunux sun dha uri.) kiya mi mrana kndah hini ka ita Sediq da”emca. “Pusu qhuni”nii u way mniq dalih qsiya yayung elu dxral alang Tmunan klwaan Bsuring. kndah babaw ucilung u 28,14 mitur ka knbbaraw na. Btunux utux nanaq ka knbrawan na u kingal kbkuy mitur.Knlbangan na u maturu kmxalan mitur.Mtna saw bbaraw bay kingal hnyuwan btunux bhuway.Mntuting kndah karac babaw mi mqi tunux dwiyaq babaw dowras.kndadah brah mi siyaw qmita u mtumun mi bhuway bay qtaan ka hnyuwan na. skdadah nklaan hidaw qmita u lmutuc dwiyaq mi way mniq rnaaw.quri ryaxan hidaw u dowras ka kiya. Wana bukuy na mi siyaw quri iril u kika msbrnux mi bling beyhing.way hiya ka beyhing bay lhngaw malu tqiyan rima hiyi sediq, kingal lhngaw kla hay malu tqiyan maxal sngari hiyi. Kiya mi emcuun mhurah mtuting kndah babaw lhngan ka utux, uxay ka malu niqan. babaw na way hraan qhuni mi spriq. Kiya lhbun lhngaw hiya u way pniqan jyujika ni malu bay patas Utux Baraw, pnuwsa dsingpu mi sejiq smnul cuxal.

Yabay pusu pnyahan rudan Seejiq ka Bnahur nii mi hndiyan dha

tmhangan. waya sejiq u spruun ta bay kana ka utux rdrudan ta. Sapah utux rdrudan ka nii mi tnhangan dha emca“Pusu btunux”mi “Pusu qhuni”. spruun dha qmita ni nglan dha utux qmita. naqah rngagan naqah kari mi ana manu smeliq rmngaw. asi ka mmlux lmnglung , smparu, tsicu mi sbliqan qmita. lhngaw utux rudan nii u ini naqah cyahuan. nasi cyahun mi uxay kiya u smliq rmngaw do smicu mi piyah bayhing bwihur,quyux mi bruwa. uxay kiya u pknarux mi puda ana manu pqraqil ka saang utux rudan, musa maduk hiya ka sediq u ida saw kiya uri. Sayang dow ini bhangi ka saw nii da, klmukan ka qmita btunux nii u “btunux bhuway”,“btunux puwayang”,“btunux mutan”sun dha tmhangan.“bnbung”,“Pusu btunux”“Pusu qhuni”sun ta tmhangan ka ita.“Pusu qhuni”nii u pusu pnyahan rudan ta,kika nkari kndah rdrudan ta cbiyaw.