Cudu gamil

Cudu gamil/ Cudu wamil/ Sudu gamil(蕗藤)

Meniq ka cudu gamil nii we wahil ka bubu na. Mosa ta cmcudu dige mangal wahil na tnreus dheran ma, wahil na gaga rmawiq qhuni baro. Egu kana lmiqu kssiyo alang, hmeru so kbkubuy ma bbuyu. Wahil cudu nngalan ta de, pntnaun qhuni smburux ka qtehur na ma, asi skiti ka rqeling na, qndisan na we tai naq kuxul dmoi txtaxa.

　　Cmcudu nii ge mosa cmcudu pswayan yayung ma, ruru niqan qcurux, ini osa yayung paru. Migin rcilung na hari ma, stemaq bobo btunux siyo na ka cudu ndesan ta, tmemaq hii ma rreun qsiya. Rreun su qsiay ciida ka cudu tnmaqan su de, asi qbhege ka qsiya denu, betaq ini hari kbhege rnreyan qsiya de, sqada qsiya hii kana cudu tnemaq di.

　　Daha ma, anaq teru seediq ka tmemaq cudu. Madis kadi mosa kmadi qcurux qnluli tgrahuc na kana seediq snuupu mosa cmcudu. Tena kddamac ciida ka qcurux cncduwan di, leexan riyung kdiyun; mesa ka kari rudan “Rmabang beyax na ka gamil cudu ma, wahil na tnreus dheran” mesa, kiya kesun daha cudu gamil.