Dahu Ali
Dahu ge, knremun knciyuk Tanah Tunux riso ba blbale Punong (布農族). Mangal Ali mqedil na. Kiya ka Bobo na, asi daha Tnungai Dahu Ali（拉荷・阿雷） ka heya di.
Eguw ba ppyahan cakus, Meykuwang ka Taywan. Dungus ppyahan nii yyexun ba mangal Tanah Tunux. Kiya ini alix mquri lmiqu truma. Speeyux ka pkdkilan nYencuming. Ciida, eguw ba ka ooda speeyah sqlhangan na Yencuming ka Nihong. Kana pnkriyux speeyux pnqlhangan daha, mnriyung spkciyuk na Yencuming peni. Musa phuling spkuudus na ka seediq cbeyo. Ani si, ngalan hi Tanah Tunux ka halang daha. Nii ka skseyang ba rriyung na seediq Punong.
Kana ba knsseyang na Qbsuran Dahu Ali, melix mkseyang di Kesacu. Ma sqerac ptlongan sapah kuung. Traan pnlixan, luqah paru kana ka hei na di. Ini qbsiyaq wada mgedang. Anu qnbsiyaq ba pnpexan Sehu Tanah Tunux. Uka ba bbrahan, kika knciyuk Sehu Nihong ka dheya. Klaali musa tmheri, kmremux sapah ptasan ka dheya. Shngeras ba Sehu Tanah Tunux, mnnangi mesa Mddhaur, Mlawa tnalang msseli. Mqaras bale musa ka seediq, ma klaan daha uxe Mdahur. Wada hi pnhqilun Sehu Tanah Tunux kana ka seediq mnusa.
Pnstoyan kana qnnaqah knsseyang, tutuy knciyuk Sehu Tanah Tunux ka Dahu Ali. Desun mtheruy knbrawan, mtheya icil na Dahu Ali ka seediq tnalang. Dheran knbaro uxe leexan sndaling na seediq Tanah Tunux. Knremun msriko ba mccebu dndulan na seediq alang ka Dahu Ali. Mtluhe ba kmremux llmiqu truma. Knkingal ndaan daha uka ini dhheki knrmuxan. Uka ba hhwaan qmerac Sehu Tanah Tunux ka Dahu Ali, Ani smmalu eluw skciyuk na seediq tnalang, Asi maku uka ttaan ka ratuc snlmeyan eluw.
Qnbsiyaq ba pnslutuc skciyuk na seediq Punong, Snegul ndaan smeelu eluw, mkela mesa so nii ka pncyukan, mseeliq naq mpslutuc tnalang peni. Paru ba snliqan quri Tanah Tunux duri, Kika malix mpdmahur ka Dahu Ali, Psmeyah pqhedu pnqnaqah. Knkawas 1933 mddahur Dahu Ali daka Nihong, Mhedu qnbsyaqn ba ka kncyukan. Eguw speeyah kari ini ppexi Sehu Tanah Tunux, pkdesun seediq tnalang. Kragun ba seediq tnalan ka ndaan knremun knciyuk Tanah Tunux nDahu Ali. Spooda beyax ma knkela na dmudul seediq tnalang, Kmdakan pnugaya, pnseediq tnalang.