Endaan smapuh rdrudan sbiyaw(傳統醫療的生命史)

Yaasa kndusan rudan sbiyaw o, seejiq alang siida asi dha ngalan pusu snhiyan saw utux rdrudan, ana mnarux qbubur, saw bi uxay biyaw pstuq hngac, ugat brahan qnpah, maku bi mring mtltu ka hiyi, uxay uri o sprang miyah bbula kana hiyi, mi niqan ka ungac qtaan mniq alang yabi wada kpiya jiyax ini slayi da, lux mstrung dha snaw do wada qduriq da dnii, asaw ka spowda ptgaya spuhan rdudan sbiyaw, saw ka smiling pusu pknarux, sbgay qyqaya uxay uri o lukus, ssaan thmuku utux rdrudan, lwaqun ka pusu sknarux do, kiya sa pdungus balay.

Brinah ku lmnglung slaqi siida mdungus balay qnita ku bubu mu, yaasa kingal keeman qtaan mu niqan kingal qrijil kmhabuk laqi rabu mtgeaguh(tbbiyax) slhbun bi miyah miying bubu mu, kla yaa hmnuya ka laqi rabu na, maku lmigis keeman kdjiqax, ana jiyan ini bi kshiya tnqiyan na uri, kiya ka miyah kmsiyuk bubu mu ni dmayaw ciqih, mhiyug ku ssiyaw hiya qmnita quwaq bubu mu, yaa mmanu ka spuhan niya, babaw duri qtaan mu gaga mangal kingal gamil kdan ka bubu mu, hmangas ciway do kbyaxan pskanan quwaq na, bukuy duri o kiya ka qnyutan na biyuq tyuqan hiyi laqi rabu kiya, saw kiya knteetu euda nii ga asaw ka niqan ndha ntru, babaw do tutuy ka bubu na nhu mhabuk laqi rabu wada sapah da, duri ni hmici kingal pala pugu sbgay na bubu mu uri, mniq ku siyaw hiya qnita endaan na smapuh euda siida ka bubu mu, kika smiling ku bubu mu: “mmanu ka snpgan su suni hug?”, hmulis smiyuk knan ka bubu mu rmngaw :“Iya khmuc rmngaw, iya siling egu euda nii uri”, ana bitaq sayang ini ku bi klai ka mmanu ka spuhan niya ni kana endaan dha, kiya ni mkdha jiyax do mstrung nami bubu kiya duri thhulis rmngaw bubu mu : “ Akay mhuway su balay wada tduwa balay da laqi, embiyax bi mkan ni shiya bi tqiyan na da”. Kla saw nii ka smapuh ksun.

Dhug priyux knxalan do, mnuda kmlawa Taywan Tanah Tunux ni klwaan Tla na kndusan ta sayang, paah mtmay alang ka pnrhulan kiristu ni iyu isil klwaan do, kiya ka snhian na sjiqun alang o ida kndax utux rdrudan ppryuxan kyokay kiristu ni mincyen paypay klmukan, yaasa musa knhuway knhuway empeungac ka smapuh hangan nida.