Gaya tnsapah(家忌）

Knkingal sapah seediq, kdkilan knkingal Seediq. Kiya ka seediq uka sapah, maha so ba gluun klaalang ka laqi daha. Bblequn ta sapah, asi ta naq mbeyax qmlahang sapah ta. Pggaalu ma mmsruwa, mskuxul mddayo mqqlahang. So nii maha qrasun niqun ta ka sapah ta. Ita nii pktama bubu laqi, asi ta ka mdrumuc meepah, ma mbeyax dmudun laqi, rmengo laqi; ma ita so lqlaqi duri, sqrasun ta lnlungal ka rudan ta. Kndrumuc ta tmelung ooda sapah, ma pklmeun ta suupu meniq kana ka mttswai. Mmqedil ma rrseno, asi ta naq mkela pkputo lnlungal, ini pkseyang, ini pkparu, ma ini psseeliq lnlungan, mbleyaq msuupu muudus. Riso ma weewa, msterung spooda gaya, so nii sa uxe pgedang ndaan ka seediq. Nii ka gaya tnsapah. Kana so ppuqun ta, mmahun ta, ini hmeti smeeliq. Pila sntkeyan ta duri, bqerus kana ka kiya. Bblequn ta so smeung so bbaruy, ma kndrumuc ta qmeepah, smeli pila. Uxe psetuq ka so ppyahan ta meniq sapah. Kiya ka maha malu kana ka tnloongan ta meniq bobo dheran.