Kliyuc
Tdiyuc/ Kliyuc/ Kliyuc(小葉桑)
smmalu patas
Qhuni kliyuc nii ga bsiyaq knudus niya hngkawas, niqan bi ririh na ka kana hnyigan na. Kana ka wasaw na, hiyi qhuni, qhuni ni siida na, ida tdwaun smalu uqun tnbugan, uqun sejiqun, smalu sinaw, tnunan rawa, sluun klabuy ni lnlamu na qyqaya.
Hiyi qhuni kliyuc nii ga mquru hari hnyigan na, uxay ka sdhriq qtaan. Nasi ini khada na o mpajiq ka hiyi na, mdudul mdakil ni maa embhgay, embanah, bukuy mhada do maa mgkliyuc banah, mgkliyuc mqalux da, mbasi ni ssibus uqun.
Kliyuc nii ga niqan bi ririh na uqun, skbiyax hiyi, kkray buuc bqlic, kmpriyux smudal ni bgurah hiyi…dnii ka knmalu niya. Slaqi siida, ida kliyuc nii ka shiya bi uqun hiyi qhuni. Smalu nanaq susuq psaun hiyi klyuc, “suq! suq” ksun tmikan spihan ka biyuq hiyi kliyuc. Hici do wana sabak ka smngari ruwan susuq da, ida uqun uri. Hiyi kliyuc ga ida kingal nanaq sknxan, kiya ni niqan ka seejiq smwayay mhuma ni lmuun dha, sbarig dha ni ssalu dha kingal nanaq uuqun duri.