Mgay Bari

Pusu bi psmiyan Mgay Bari o saw nii

Sbiyaw balay ka rudan Truku ga, mkla bi dmuuy quri hmnru bbuyu, quri qngqaya djiyun qmpah o smmalu nanak ni mttuku balay djiyun kndsan dha nanak uri. Mtbiyax balay qmpah ka rudan Truku sbiyaw, mgrbu balay mtbiyax qmpah ni gbiyan o hana miyah sapah paah qmpahan dha. Mnhdu mtbiyax do o musa maduk bbuyu ka snsnaw, kyiykuyuh o tminun sapah. Quri qngqaya djiyun dha o sowki, parih, suqu, phmaun dha o sari, masu, pgu, basaw, sqmu, brisan, beyluh, bunga. tmukuy ni mhuma ana manu pnegalang brah na o asi ka plealay musa smapuh utux rudan han, “kiya ka mha suyang bi hru na ni malu bi gnhiyi na ”msa ka kari rudan sbiyaw. Gaya smapuh o saw nii, Msgasut alang ga, mk4 jiyax ka pnsrmalan na ni spida hraan idas ska rabi ka smapuh biyi bbuyu hiya. Paah sapah mowsa smapuh ka Msgasut o asi ka madas kingal laqi snaw tuhuy hyaan musa, Msgasut o rngagan na ka laqi snaw kndadax mowsa siida, “Mowsa ta smapuh utux ka sayang da, iya bi squwaq ni gmlux balay”. Babaw na nii do phngan na ka tahut ngalun na ka qbulit ni qhuni, sqada na ngangut ni musa mngal bgurah qhuni marah mutung mtahu. (Pusu na ka nii ga qmada smudal lnglungan ni psbgurah euda). Iyax jiyax musa smapuh o ini phing ka tahut sapah. Babaw na nii do mutung harung gaga jiyun laqi snaw ni hmiru harung musa spuhan dgiyaq, madas ghak uqun mha smapuh ka msgasut siida dmuuy harung prdax mhiyug kiyig na ka laqi snaw nii. Mnhdu smapuh pnaah spuhan dhuq alang do miyah hyaan kana ka seejiq tnealang miyah peangal ghak nadas Msgasut, yaasa klaun dha nadas Msgasut nii ka ghak o suyang bi ni mrana bi gnhiyi niya. Kiya ka kiya ni ini tduwa hmut musa tmukuy ka seejiq, asi ka plealay musa tmukuy ka Msgasut kiya ka suyang bi hru ni mrana bi gnhiyi na, kmtuy o saw kiya uri, asi ka Msgasut ka plealay musa kmtuy, kiya ka ini tmbrii ka seejiq mkan siida. Nasi aji saw kiya dga, ini kmalu hru na ni naqih gnhiyi na uri, duri o tmbrian mhuqil ka seejiq, ana qbhni saw kiya uri, msa ka kari hnici rudan Truku sbiyaw. Saw nii ka kari Msgasut, “ux tmninun ana manu! Ana rabangqrasun tndhuun ka isu, yaasa kana klgan ghak uqun ni pnegalang ni kana mneudus o nnisu kana, sghak nami ka ghak o plkilun su ni mgghiyibitaq nami lala kntuy ni emblaiq nami uqun”,“Utux Bari hkawas duri o tai saw lala kntuy nami ni pbliqun su duri. Mhuway su balay utux bari. Sus Bari! ”

pnyahan kari

• 金清山. (2011). Wikipedia 維基百科 族語詞條試寫─原住民族語詞條 2011作品集. 教育部.