Mgay ni mangal

Mgay ni mangal(捨與取)

Niqan kingal ka malu kari ga spatas Suyang Patas hiya. ‘Mgay ni mangal o, nuqu mblaiq ka mgay.’ Sbiyaw seuxal, ksula bi ka dnuuy nami ni, qmpah phuma pnegalang dxgal ka seejiq alang nami. Kiya ni asi ka khbaraw hiyi ka ruwan sapah mddayaw qmpah, kika mha mtngi ka kingal ruwan sapah. Kiya ka kiya ni nasi hghaw ka kingal ruwan sapah da o, niqan ka lupung ni gtgut kiyig hiya miyah dmayaw. Manu saw kiya ni alang o mdka kingal ruwan sapah, mseupu ni mggaluk balay. Niqan ka qrasun o mseupu mqaras, niqan ka mqraqil o teumal suulax kana. Saw nii ka alang nami seuxal, ana ya ini tuku ka dnuuy nami, kiya ni emblaiq balay ka lnglungan nami, ana ya ungat bi ka brax nami, kiya ni sruwa nami bi mgay.

Hana ni Peydang msdungus nii o sblaiq bi pstrung ni mtucing 8 laqi. Kiya ka kiya ni, ini tuku ka djiyun dha ni mqraqil balay. Peydang o acih bi sbuway na isil alang ka laqi na tgbilaq. Mkla saw nii lnglungan na ka Hana da o, naqih bi kuxul na ni ini bi sruwa. Babaw 1 jiyax da o niqan 1 seejiq alang nami ni Samu ka ngahan niya. Rngagan na ka Peydang sruwa bi dmayaw mdanga laqi na tgbilaq kuyuh, yasa kmrawah bi 1 laqi kuyuh ka Samu nii ni kika slingan na ka Peydang. Kiya duri o, nasi mblaiq kndsan na hici ka Peydang da o, tduwa na ngalun duri ka laqi na tgbilaq nii. Qmbahang saw nii kari ka Peydang ni Hana da o asi qqaras bi smruwa. Asaw djiyun quri sapah, mtbiyax bi qmpah ka Peydang nii. Mseupu dha seejiq alang nami mowsa dgiyaq tmqhuni.

Kiya ka kiya ni aji mslxan ni msriqu bi ka qmpahan nii. Niqan 1 jiyax, ya ini dhuq qmlahang hiya nanak ka Peydang nii da o asi dai smbut qhuni ka qaqay niya. Kiya do aguh dha mhadut sapah spuhan. Kiya ni ungat bi klaan ka pspuhan ni ida asi krtun ka narat qaqay Peydang. Smtrung saw ni mqraqil ka Peydang da o naqih bi kuxul na ni ki bi saw hadut mnkuung ka kndsan na ni ungat snluan. Saw ni wada muda paru bi mqraqil ka Peydang o, sgalu dha qmita ka Samu ni tkdayaw hyaan. Ana ya ini hari ttuku ka brax dha ni ida saw ppusal ka dnayaw dha Peydang. Kmaguh lupung na ni gtgut na ni kana seejiq alang. Mseupu lnglungan dha ni dmayaw Peydang ni pkbiyaxun dha uri. Saw ni ka bnuway dha o gaga tnbuk qsahur Peydang kana.

Babaw ini qbsiyaq do embiyax duri ka Peydang nii, ana ya ungat kingal ka qaqay na o ida drumut bi miing sadu ni ini bi mlih qpahun na. Paah smqit djima ni bitaq tmabug kacing, paah gmbarig damat nanak ni bitaq smbbarig kana qngqaya djiyun. Mnda drumut na ni kmbiyaxan na do wada mrana ka djiyun na ni mttuku balay ka kndsan na uri da. Ana yaa saw kiya ni ini na bi shngii ka gnaalu Samu ni kana lupung na kska alang. Bitaq sayang ka Peydang ni Hana o powda qnpahan ni snluan dha ni mhuway balay ni dmayaw balay sejiqun ni qpahan alang.