Patas Suyang Kari Truku

Patas Suyang Kari Truku 太魯閣族語聖經 1923 hngkawas mtmay kska qsahur kingal mneuwit bi ni tgbilaq bi kuyuh Truku Ciwang Iwal ka kingal dmux Kari Utux Baraw, paah siida ka hiya o “Bubu Pnrhulan Seejiq Mqqdgiyaq Klwaan Tayang” sun seejiq tmhangan. Ana yaa paru balay ka tnrqilan knsat Nihung ga ini biyaw mkgarang kana elealang Truku ka kari Utux Baraw nii. Ciwang nii o dmuuy kari Klmukan Ruma ka muda gmarang kari Utux Baraw. 1945 hngkawas babaw mnhdu ka mtgjiyal, paah siida seejiq o hana mtrawah thmuku tmdahu Utux Baraw, hbaraw balay ka seejiq snhiyi Yisu, mkmniqan Suyang Patas ka lnglungan dha, 1954 hngkawas miyah paah klwaan na Amirika ka Yudaw Watan (Dr. Ralph R. Covell) mqaras balay dmyaw hdlun kari Truku ka Suyang Patas. Plealay balay o smmalu kari pshnang 22, kiya o, ㄅㄇㄉㄋㄌㄍㄏㄨㄧㄚㄙㄦㄜㄠㄞ (b d g q x y ngㄅㄉㄍㄍㄏ十兀). 1955 hngkawas smmalu kingal qpringan mhjil Suyang Patas Kari Truku, kmeaguh Teylung Lituk ka pruway hmjil kari Truku, mqita endaan hmjil o Iyang Taying, Yudaw Pisaw, Wilang Takuh, Tasaw Teylung. Nii o wada qhduun 1963 hngkawas ka kana Bgurah Suyang Patas, kiya do muda mqaras tmdahu Utux Baraw qnhdaan hmjil Bgurah Suyang Patas, 29 jiyax 1 idasni bitaq 7 jiyax 2 idas o muda Pnrhulan Swasal, Sdagan, Bsngan ni pnrhulan ryaxan hidaw Snuwaing. Biqan kingal sngqaras xiluy liqa aji na ssnguhi ka Yudaw Watan (Dr. Ralph R. Covell). Paah siida do hbaraw balay seejiq matas kari Truku empprngaw ni smpug Suyang Patas. 1980 hngkawas tai saw mha mtduwa mggaluk kana tnlangan ka Suyang Patas Truku, Yudaw Watan (Dr. Ralph R. Covell) nii ga smmalu patas Ruma pshnang kari Truku 29 patas, kiya o, b c d g h j k l m n p q r s t w x y ng, a e i o u, aw ay ey ow uy, kmeaguh Yudaw Pisaw, Katu Lowsing ka mhjil na “Hmjil gnegan Suyang Patas Smudal” Yudaw Dangaw,Yuki Lowsing ni Jiru Haruq ka mqita endaan, 1988 hngkawas o wada qhduun da. Yaasa embiyax bi lnglungan dha ni meysa bi kingal Suyang Patas Kari Truku kana ka laqi Utux Baraw laqi Truku, kiya do 1994 hngkawas muda Prngagan Srnabaw Pnrhulan Truku Tg34 siida, wada muda mssruwa ka pnrngagan“mhjil Kari Truku Bgurah ni Smudal Suyang Patas”, kiya do paah 1995 hngkawas kmeaguh Yudaw Pisaw, Iyang Taying, Iyuq Ciyang ka mhjil na, niqmqita endaan hmjilo Yudaw Dangaw, Yuki Lowsing, Jiru Haru, 6 idas 29 jiyax 2004 hngkawas ka mnhdu hmjil, 10 idas 1 jiyax 2005 hngkawas mgrbu 10:00 “Mgay Mqaras tmdahu Utux Baraw qnhdaan hmjil Suyangt Patas Kari Truku” mniq Pnrhulan Ciwang. Paah saw nii ka Pnrhulan o pusu balay qpahan pkrana kari, duri ni dmuuy patas saw nii emppatas ka seejiq uri. Pgkla patas Ruma kari Truku ka Mklawa Ttgsa Klwaan ni Qpringan pnsealu Seejiq Tnpusu Klwaan ka 15 jiyax 12 idas 2005 hngkawas ga jima dniyan Truku 1980 hngkawas da. Duri o Yudaw Watan (Dr. Ralph R. Covell) nii ga paah hmjil Suyang Patas Kari Truku pssli Pusu.Patas smmalu kingal patas niqan bi brihan sluhayan kari Truku ana ima, kiya o “Patas pusu slhayan kari Truku” 20 jiyax 7 idas 1957 hngkawas. Paah 1954-1963, 1980-1988 ni 1995-2004 hngkawas saw nii mtru ka muda hmjil kari Truku ka Suyang Patas o yaa bi 3500 ka pnssli pusu kari nTruku, Pusu kari nii o kika pusu bi prana ngalan kari smmalu Patas Pusu Kari, patas sslhayan saying. Manu saw kiya do paru bi bnrihan kana ana manu sslhayan kari Truku sayang.

pnyahan kari

• 金清山. (2011). Wikipedia 維基百科 族語詞條試寫─原住民族語詞條 2011作品集. 教育部.