Qhuni bsrux
Qhuni bserux/ Qhuni bsrux/ Qhuni bsrux(構樹)
smmalu patas
Egu balay qtaan ssiyaw alang, elug saan qnpahan ka qhuni bsrux ksun. Yaasa qhuni bsrux nii ga smkila bi ana kneinu, mrana bi uri, ida ini biyaw knkilan na uri, kiya ni egu balay ka. Qhuni bsrux ga niqan bubu ni tama dha klgan, ida tmphpah kana. Dtama o wana qtaan tmphpah, ini tghiyi, bubu o tmphpah ni tmghiyi kiya. Ida tduwa uqun ka hiyi qhuni bsrux nii, qmowpang ni ssibus uqan. Yaasa egu wasaw na ni tduwa mipix ni ini kuxi saan sqapah ruciq hngak, kiya ni ngalan bi hmaan kleelug alang paru breenux sayang da ka qhuni bsrux nii. Nasi musa ngalan bagah qnpahan, mmaku ni lmiqu ddgiyaq o gaga hmaan hiya ka qhuni bsrux nii, ida malu bi saan tsasaw ni empqlahang bbuyu uri. Wasaw rqnux ksun Klmukan ka qhuni bsrux nii, yaasa uqun bi rqnux ni ssamac ka wasaw na. Mnsa ka pnatas dha sayang, wasaw qhuni bsrux nii ga, niqan bi ririh na uqun ka wasaw na, ida skbiyax bi hiyi uqun ka wasaw na. Saw ka skkray buuc, pkrdax dowriq ni skbiyax shmu uri uqun ka thiyan mhanuc gamil na ka wasaw qhuni bsrux nii.191