Qnawan ddilun (電話) smmalu patas

Qnawan ddilunMalux nami kesun Qnawan Ddiun ka qyqeya nii we, niqan naq pusu na kari: Cbeyo, hani hari meyah qmlahang yami ka, Tanah Tunux ciida, kika kleeluw pheyu eruc ka Tanah Tunux ma, blebin qnawan, iya ba mhmeti psetuq ka qnawan nii kesun na rudan miyan cbeyo. Bobo na, splawa nami na sapah ptasan de, mgeriq bubu qnawan nii ka zunsa Tanah Tunux ma, ga mprengo,ga mrrengo daka ima zunsa nii, mesa lmngelung ka rudan nami, ma so hari ga rmengo utux mesa. Klaun daha mesa mphaduc kari ka qnawan nii de, asi daha tnyani mesa Qnawan di, kari Tanah Tunux ge “deng-wa” mesa, kari Telu saya de “teng-hwa” mesa.

Alang miyan Gluban we, betaq ku yong-nense hari ka niqan deng-ki, berah na han we, hmiru miyan kan-tera, lmungu nami qhuni ka pure ido, hmanguc damac ma dngedang qsiya mtilux. Muuyas ku so-cyu hari de, niqan terebi duma ka seediq alang miyan di, ani si ini keegu sapah dehuk maruy terebi nana, bobo na dungan we, niqan ga-su di, kika ini nami lungu qhuni kndalax ciida di. Betaq bale meyah ku mgsense Hori de, blebil ciida Qnawan sapah ka seediq alang nami di, bubu na Qnawan sapah nii we ini pgriqi, asi ppexi. Ini nami blebil Qnawan sapah han ge, wano ba sapah ptasan ka, niqan Qnawan pgriqun ma, kndudul mntena kana ka bubu miyan Qnawan sapah duri di, tngiyo ppexan. Kndalax niqan ten-naw nii de, smmalu Qnawan Ddilun ka seediq Dame quri hunac hii di, mgaya bale han we, paru, chedin ma mkere brigan, asi nanaq ka seediq niqan pila, dehuk maruy Qnawan Ddilun kiya ma, so ke-sacu, so qbusran peni. Ye wada ini dehuk maxal knkawas ho, kika prading niqan Qnawan Ddilun biciq so ka, ga ta dooyun saya nii di, tiku hari bnrigan na duri, ani si egu riyung klegan ma, mnlamu naq ka ko-si msalu Qnawan Ddilun nii duri. Ado ka asi psai lubuy ma, asi dsdesi ani inu ka Qnawan Ddilun nii, kuxun riyung dmoi uniima, ani laqi muuyas duri we, sbaruy tama bubu daha ma, dsdesun daha mosa muuyuas ngerac. Kuxun riyung dmoi laqi muuyas ma, riso weewa ka Qnawan Ddilun, ado ka ini pntena Qnawan sapah, egu riyung so tthiqan laqi ma riso ka Qnawan Ddilun, ado mkela dmoi te-naw ka mnuuyas hndure, kika ini daha saani inu ka, dmoi ma theyaq Qnawan Ddilun, so ka rudan hari ini kela dmoi te-naw de, ini naq sriyung theyaq Qnawan Ddilun ka dheya, ngalun daha Qnawan bale dmoi.

Ani naq kesun malu bale ka, niqan Qnawan Ddilun nii we, niqan ka naqah na duri, tmgesa ooda naqah laqi riso hari, kndalax Qnawan Ddilun smneeru oda naqah ka laqi ge, ini kkela ka tama bubu daha, ado ini dehuk hiya ka, knkela daha dmoi Qnawan Ddilun ka tama bubu daha. Qnawan Ddilun nii we, smnegun bnarah te-naw, kika maha mntena te-naw ddilun bobo beyax na duri, ga kndudul so besyax na te-naw ka, beyax na Qnawan Ddilun nii saya di ma, ngalun sasing-ki psasing, mangal kari rnengo seediq ma, qtaan ega duri, uxe pkberih di, maha rmabang malu bobo na Qnawan Ddilun.