Qwarux

Qwarux(黃藤)

　Mesa ka kari rudan alang, egu riyung oda na ka qwarux nii ma, dooyun riyung ita Seediq. Cbeyo han we, mosa neepah ka rseno ma, ani naq mosa lmiqu, mmeeyah alang de moda mangal qwarux. Migin qwarux hmneru so cbuwan hido, ini angal mneniq qeting, ado mgipuh ka hmneru qeting ma, ini eniq dooyun. 　

　Dehuk alang de bcbacun daha han ma, phdagun daha ngerac sapah daha. Mdengu du ge doosun ka quti na han, kika blequn dmaus dungan ka benac qwarux, qtaun mptinun so qyqeya maanu ma, pndngusun naq ttinun ka benac dnoosan. Kana ooda nii we daun daha mnsenge tikuh pneeyah neepah, uxe duri we daun daha qmuyux meniq sapah, mdrumuc riyung ka rudan ta cbeyo. 　

　Egu ba ooda na ka qwarux nii, slmeun bruru, wahu bruru, rawa qcurux, bunuh; stqari ddooyan hlmadac, puyan, snbragan; ngalan snuyuk bbekuy phuyu sapah, smmalu behing, tibu babuy ma kadu rodux, kana dnii. Yaani gaga rhuqan smneeru ka duma dungan.