Rahul truku taypey

Rahul truku taypey台北太魯閣社團

Seejiq tnpusu gaga mniq alang paru Seejiq tndxgal Teywan o ini khbaraw, yaa bi 2 tnegkmbkiyan(2/100) nanak kana seejiq Teywan . Hbaraw balay ka seejiq tnpusu o gaga mniq alang dha nanak .Gaga mniq alang paru o aji ka hbaraw, yaasa gaga musa matas ni qmeepah alang paru o mtbrih sapah dha nanak hki .Sayang ka seejiq tnpusu o yaasa ungat hari ka giman qpahun alang dha nanak ni musa miying elealang paru qmeepah .kiya do ga mniq paru alang Taypey seejiq truku spngan o niqan mspat kbkuy nanat,ini khbaraw ka balay bi laqi truku.

Rahul truku ga taypey qpuring o niqan rima klgan,prajin bi phiyug o Mari Bari emptsuusa kndsan qpuring,mngari kmxalan tru hngkwasan ka phiyug mniq knkla kndusan klwaan Taypey,tgdha phiyuy o truku pslupun qpuring,tgtru o Taywan seejiq tnpusu kndusan nqpah qpuring,tgspat o Taypey seejiq tnpusu truku kndsan qpuring, tgrima do Taywan seejiq tnpusu truku kndsan qpuring,saw endaan dha sayang o ida pusu o gaya rudan sbiyaw ka qpahan dha,Smnru endaan rudan ka baki o,tgkingal saw Smiyan knciyan jiyax siida o,Paah 8 idas bitaq 9 idas kngkingal hngkawas o,niqan muda mqaras smiyan knciyan ka kana alang truku .Spruun bi kana seejiq alang ka jiyax saw nii ni mseupu mgrahul mqaras jiyax .Paah laqi bitaq rudan mssli ngangut paru meuyas ni rmgrig mqaras nngalan lala uqun .Kiya do shkawas jiyax siida, peapa asu skiya paah Taypey miyah sapah alang nami ka 1 ruwan sapah nirih mu tama ,Rmngaw ka nirih mu qbsuran snaw, Lnglungun nami balay ka endaan mqaras smiyan knciyan alang hini msa ! Smnru endaan rudan ka baki o,tgdha kari na duri,Mgay Bari,mkdka mnhdu kmtuy uqun ka kana alang do, asi usa bbuyu tmsamat ni miying samat ka ska alang dsnaw .Dhuq sapah do asi pseupu mhapuy uqun dha, mqaras kana ka alaang, muyak babuy saw rmun bi ka snaw balay , hmlama ka kuyuh ni mhapuy samat ka kana kuyuh .Empsgasut o slabu na rnabaw ka hlama, pnhapuy hiyi siyang ni samat ni sinew masu, nii o saan na mgul sida qhuni ngangut sapah ni ssapuh na utux rudan .Saw nii lnmuan na smapuh ka empsgasut, Hngkawas nii o saw nii wada lala balay ka pndungus su uqun panah qmpahan, duri o samat pnaah bbuyu ni wada ungat ka mnarux pnegalang .Hkawas duri o pkdkili bi ka pnegalang, pdngusi bi samat ka musa bbuyu ni saw mha malu bi ka dnsan dha musa mdkrang” msa ka hnici kari rudan sbiyaw.

Mari Bari seejiq tnpusu kndsan qpurin ndaan dha o mngari kmxalan tru hngkwasan ka phiyug,pusu knklawa o Imi Akit ka hangan na,pnaah alang kalingkow Maribasi Rubas,prajin qpahan dha o pnaah rmgrig ni jjiyun tatuk,qowqaw,uyas lubug saw rudan truku sbiyaw,sayang do niqan bi ngahan ka lubug qtaan saw smluun dha da,niqan ka kingal laqi risaw truku,hangan na o Rabaka Taru pnaah matas tgbilaq ptasan siida o,sngur tduhuy tama ni bubu na musa saw pqita lubug uuyas truku,endka saw dtuhuy gaya rrudan llingay mklakil ka hiya.mangal lala bi paru brah narung uri da.