SARS-CoV-2
Sars-CoV-2
smmalu patas
Sars-CoV-2 (Sinkwanpingtu) nii we, birus (pingtu) pknarux COVID-19 ma, birus korona (pingtu mgbunuh na thowlang) ka nii. Mllamu klegan birus korona pknarux seediq wada ta klaun. Pknarux knrexan quri pcaqun/teerang uxe de lhebun/iraq ka brbirus so nii. Cenga 20 knkawas we, snpusal pkpunu ka birus korona ini pntena klegan daha, kingal we SARS-CoV cenga knkawas 2002~2003, icil we MERS-CoV cenga knkawas 2012~2013.
Betaq mhiti na knkawas 2019 de, tkriyak ka birus korona bgurah nii. Mnugaya de, kesun daha birus Wuhan. Birus nii we, pknarux teerang ma egu riyung seediq wada na phqilun. Mnarux nii we, kesun daha mnarux teerang Wuhan. Ini beyo mlatac peeyah Telu ka birus nii ma meyah betaq ulaalang bobo dheran. Mreeru cenga sseediq ma ini paalix phuqil seediq ani inu. Kndalax betaq alang ma qlhangan icil ka punu nii we, prading tmsiiyax seediq Wuhan ka seediq pneeyah alang icil. Kika seyhu na Telu we, mnbarah tmngayan punu nii, kesun daha “Sinkwan Hweyen”, “Mnarux teerang birus korona bgurah” ka dungus na. COVID-19 we, kesun na Pnsliyan Pkbyaxan Qqqlhangan (國際衛生組織) tmngayan ka punu nii, “Mnarux birus korona 2019” ka dungus na. Ini pntena ka birus daha ka mnarux/punu, ncugil gmimax mpprengo duma ka seediq, kika asi ta ka ptgaanak qmita.