Sapah Skiya (飛機)

Uxe qmnita sapah skiya ka rudan miyan yami cbeyo, betaq yahan nami na qmlahang Tanah Tunux de, seediq mdudul alang ka, prading ba qmitq kesun sapah skiya nii.

Ndesan prigo qbsuran Tanah Tunux ka dheya nii, desan na prigo alang daha bukuy rcilung hii, mthbaro ka seediq mdudul alang ndesan na prigo hii ciida mesa, ani si gneegan qbsuran Tanah Tunux ma, tngiyo ba seediq mdudul alang ka gneegan na, mnosa ka mdudul alang miyan Mehebu hii ciida duri, Mona Rudo daka Mona Sine, dheya ka meyah smneeru ntaan daha di mesa kari rudan.

Mosa alang bukuy rcilung Tanah Tunux hii ka dheya nii si we, egu ba ka alang ndaan rmigo ma, rmabang ka ali saanan miyan na prigo sapah supi mesa, kiya si dungus na blbale ka Tanah Tunux ciida, irih na sniicu yami Seediq. Anu ka, tena niqan sapah skiya, niqan asu paru, halung paru ma halung tpetak ciida ka, sapah supi Tanah Tunux di, sklui qmita qyqeya supi so nii ka, kanna seediq mdudul alang mnosa rmigo hii ciida mesa. Sapah skiya ka srnuun daha riyung.

Sapah naq maanu ka, mosa skiya karac baro kii di mkkesa ka seediq ma, kndalax karac baro ptuting baudang de, ani knkana pnspreqan na tuting dheran, so ba smiicu mesa. Qmita sau supi paru duri we, kndalax rcilung pstalang halung na paru ma, pdngusan na bbuun na quri dheran alang, mlgelu kana dheran nniq1an miyan smdeho hii mesa, kedu bale ka nii di mesa seediq dungan, ma na maha asi tnnesi bale pspaux alang ta mesa.

Kiya, betaq kmciyuk mccebu daka Tanah Tunux ka, rudan nami meniq alang Paran hii ciida, meyah dehuk alang miyan Mehebu hii ka, sapah skiya supi Tanah Tunux, ye ado uxe mnita ani texan ka seediq alang nami, mbahang hrenang sapah skiya ka seediq alang de, meyah nganguc, meyah dmeeda sapah skiya. Inu dungan, ptuting bakudang ka sapah skiya, mita ka seediq alang de, “Ga tuting laqi na da!” mesa, inu ka “laqi” na kiya, dehuk dheran de, “pong!” si hmrenang paru ma, mlgelu kana dheran, asi lux mlhengo paru ka dheran, msbobo baro so snkyaan ka seediq bnuwan na, asi maku so tnteyan hei seediq mswaye tqada so uciicin.

Rmengac, lmingis qduriq ka, seediq malu utux ini nnteni rehaq bakudang kii, ake ba bale ka nii di mesa. Mccebu Tanah Tunux daka rudan nami ciida duri ge, gmneeluk halung tpetak supi Tanah Tunux ma, srriyux mosa dmoi ka rseno pnccebu supi Tanah Tunux, ini daha klai dmoi. Bsiyaq ba lmngelung ddoi halung tpetak ka rseno mneni hii, wada daha qlengun mkela di, ani si, prehan halung tpetak nii we, ini skkingal mosa bbali na, asi psnegul ma ini alix, wada daha naq qeun smeeli hii ka bbali na di, ssatang mcebu supi Tanah Tunux de, tena uka ka bbai na di. Wada daha hari idas ka pncbuwan nami ciida ma, moda rmehak patis mesa laxo ta mccebu ka Tanah Tunux, speeyah na sapah sliya baro rmehak patis kiya, so hari pila klabuy tanah ka, patis kii kndalax karac baro mtuting dheran, lmuwan seediq ma qtaun daha, le daha pila peni.

Saya de klaun nami mesa, egu klegan ka sapah skiya nii di, niqan naq sapah skiya so hari pdaus, niqan sapah skiya maapa seediq mosa alang niinu, niqan sapah skiya supi duri, ani maanu klaun daha smmalu ka, seediq bobo dheran nii saya di.

Pteumal pptasun(資料來源)

郭明正. (2011). Wikipedia 維基百科族語詞條試寫─原住民族語詞條 2011作品集. 教育部.