Sapah pyasan mu dgiyaq(Truku)

Sapah pyasan mu dgiyaq(Truku我山上的學校）

Sapah pyasan mu dgiyaq, malu balay qtaan ,malu balay saan meuyas uri, niqan emptgsa ni niqan laqi meuyas , mseupu matas ni hmrapas mniq sapah pyasan, kiya ni smkuxun nami balay musa sapah pyasan kdjiyax. Sapah pyasan mu o dgiyaq gaga alang tnpusu seejiq, yami llaqi meuyas o pnaah nami alang ni ssiyaw qnpahan. Kiya ni duma nami o mksa nami nanaq musa sapah pyasan , duma nami o peapa nami paru rulu musa sapah pyasan,uxay uri o pnapa nami rulu tama ni bubu musa sapah pyasan. Dhuq nami sapah pyasan do tna niqan ka emptgsa gaga mhiyug rhngun sapah pyasan tmaga tnan miyah meuyas, kiya ni wada mu qtaan nii kngkingal miyah sapah pyasan ka laqi meuyas,kiya ni mqaras ku bi musa sapah pyasan kdjiyax. Sapah pyasan mu o niqan egu klgan qhuni gaga mtqri sapas pyasan mu hiya, saw ka qhuni dara , nasi dhuq krpuhan do o priyuh qtaan ka wasaw niya da, duma wasaw o wada asi knpriyux mgrhibung qtaan. Saw ka qhuni snuwing nasi dhuq snrabaw do o tmphpah kana dni saw bi embanah qsiya gsilung qtaan, saw bi embhgay qsiya gsilung qtaan.Kiya ni hbaraw bi seejiq miyah ruwan sapah pyasan mu psasing ni mksa.Yasa wada malu bi qtaan ni malu bi seknxan ka bgihur na；ssiyaw sapah pyasan o egu bi klgan ka phpah uri tuhuy mnan smluhay. Duri niqan kingal llabang bi spriq saan nami hmrapas ni tuumal kdjiyax . Pnaah isil alang ka seejiq miyah qmita sapah pyasan mu o rmngaw bi kana “tagay bi knmalu qtaan ka sapah pyasan namu nii! sraun mu balay!” msa tmdahu balay. Sayang tduwa ku meuyas sapah pyasan hini o qrasun mu balay. Tmgsa mnan laqi meuyas ruwan sapah pyasan o hbaraw bi ka klmukan, niqan kingal ka Seejiq ni kingal ka Paywan uri, dhiya ga mdrumuc bi tmgsa mnan, sbliqun nami dha balay uri. Sngayan Tgspac jiyax o Niqan kingal ka emptgsa miyah tmgsa mnan kari Seejiq , kingal ka emptgsa kari Tayal ni kingal ka emptgsa kari Bunun uri.Jiyax nii o emprngaw nami kari nami nanaq. Pusu mdudul sapah pyasan mu o embiyax bi dmudug mnan laqi meuyas quri kari Seejiq, kari Bunu, kari Ttayal ni kari klmukan uri, yasa hiya o Seejiq balay uri, spruun na balay ka endaan rudan sbiyaw. Psdhug bi kari “iya bi shngii ka endaan drudan ta sbiyaw, niqan malu bi gaya ta ka ita Seejiq, ini tduwa nhmuc, kmbiyax matas ni qbhangi bi ka kari tama namu ni bubu namu”msa。 Laqi meuyas sapah pyasan mu o niqan nami mspac kmxalan rima hiyi,pggalu nami kana, pddayaw nami kdjiyax uri, saw nami balay kingal tnsapah, saw nami balay mnswayi. Meuyas nami sapah pyasan egu bi klgan ka slhayun nami, saw ka kari ta Seejiq ni endaan rudan ta sbiyaw, saw ka kari Ameyrika, muyas uyas ni rmgrig nami uri, matas patas ni tduwa ptasun ka lnglungan ta nanaq uri. Yaku o tduwa ku meuyas sapah pyasan saw nii, qrasun mu balay, sgealu mu bi ka gaga mu thiyan meuyas sapah pyasan mu. Spruun mu bi ka emptgsa sapah pyasan mu uri.kiya ni yaku ga, sgealu mu bi ni qrasun mu bi tndhuun mu bi ka sapah pyasan mu.