Sediq- tmcamac

Cbiyaw cbiyaw ciida pa, kiya rungay knxalan sediq ciida uri pa, malu balay dngusan na ka kndussn dsediq. Mhapuy ta macu ciida, kiya ida nkiya mkksa ka thuun qhuni psqama nanaq; mpkan wawa ciida u kiya ida nkiya hmiti kingal ubal ka boyak, kiya hngedan ka kingal ubal daw, kiya wa mthngay kama ka malu sknxan wawa. Kiya mi masu lux mkmsipaq boyak ka taxa sediq, msaang bay ka boyak, mnchaya rmngaw: “Yamu sediq pa,naqah babay kana ka yamu, ngalan namu msspais cmiyuk ka mnhuway nii！ Kndadax saya daw, ana nanaq mseuriq lmawa walu ka yamu, uxay nami bay ka yamu, uxay nami bay miiyah, yami pa,saun namu smliq ka nriqan mhuma pnwalang namu!”mhdu rmngaw daw wada mrmux dwiyaq ruwan da. Bukuy daw, ini bay sdalih alang ka boyak, kiya wada tiling ddwiyaq ka rahuq ccamac uri da, asi bay ka musa tmcamac, kiya niqan uqun ka wawa ccamac.