Tupih/ tpih/ tpih油葉石櫟
Tupih/ tpih/ tpih(油葉石櫟)
smmalu patas
Kingal naq ba ttaan ka qhuni tupih, kndalax pusu truma egu ka gncida na pusu qhuni; ccida na ge mlqeling qtaan. Niqal cnhbiyan kndkilan ma so maapung mbhege ka qraqil na qhuni. Qhuni pgsama klaali ka heya. Lmiqu siyo uxe pkdere bale ka ttaan kdkilan na peni.
Qnedis mgdoriq ma mgkeruc qtaan ka ssiyo waso na. Ttuwax na niqal uban runge. Rbagan mbhege msderux mslebi ka phepah na. Mpmisan mhada ka hei na de, mgtumun knbbunuh mntena ba kawara ka sduduy tuwax na baro. Puqun ka hei na duri, ma kuxul ba puqun brihuc duri. Slmeyan pcpingan, ma malu be ngalan qhuni tahuc peni.
Mgdengu bale mtuting dheran ka hei na de, mtuting ka bunuh na so ba kawara baro na kiya duri. Ckceka na mkobu tikuh kiya, ki nii ka stgiya kexil baga. Steruc pgyaun kexil baga qtaan qnbsyaqan pntgyaan na mpgeriq. Ckceka na nii duri, pkcaan posa snqriyan lqeling so tuwax, ma xxiluy biciq peni. Ki nii ka ptbyaxun sdooyan spgeriq baga kixil, spgeriq rrngayan koma tthiqan na ka lqlaqi.