Uyas Turku

Uyas Turku/太魯閣音樂

Lubug Truku sbiyaw o niqan lubug qawqaw, mgagu, lubug qnawal ni lubug tatut 4 keelgan.Prajin saw mkla na ka tatuk truku knkla o, pnaah kingal seejiq truku mniq alang Maribasi Ciyakang,hangan na o Ha Yu Yu Taw,gaga mtabuy ka qpahan na sayang,aji wana mkla tatuk ni lubug qowqaw,pgagu,uyas rrudan sbiyaw ka knkla na bi balay uri. Sayang do prngaw ku huya msa sawun ssalu ka lubug qowqaw ,manu ka sun qowqaw qngqaya hnlayan smalu rudan . Snalu dha bnegbaw kulaw djima ni pnseedal hipay xiluy limuk .Jiyun knuwan ka qowqaw nii ,djiyun ini ptbiyax mseupu mqaras siida .kiya ka kiya ni ini bi jiyi ka pklug mnbasi siida . 1-Lubug qawqaw Truku ga ska o niqan lhpis bi btaw snalu djima ni ska na psaan lhpis bi btaw tnpaqan snalu xiluy embanah 2 keelgan, kiya o lubug qawqaw sun. Lubug qawqaw snalu djima ka btaw na o kika prajing bi enseuxal lubug qawqaw Truku. Sbiyaw balay ka risaw ni wauwa Truku ga lmubug qawqaw empprngaw dha quri niqan lnglungan txaun ni nirih rrngaw kari txaun, kiya o lining kari aji uri o pnskaraya epprngaw. Qtaan ta paah saw nii, aji wana jiyun lmubug muda mqaras ka lubug qawqaw,., plglug lnglungan rgrig, lubug jiyun quri msskuxul uri. pshnang o psaun pdhung ka lubug qawqaw ni pshngat miyuk muda lmnglug lhpis ptaw snalu djima. 2-Lubug tatuk o kingal rmabang bi lubug Truku, snalu qhuni sangas, prihut, qulit, byugu, plux, rbuqil, ni dgarung. Rmabang bi msleexan mripuh bhangan hnang na ka qhuni prihut, mkndux bi bhangan na ka qhuni rbuqil.Sbiyaw balay mnniq ska dgiyaq siida ka kngkingal sapah rudan Truku o niqan lubug tatuk dha kana, qulung gbiyan mnhdu qpahun dha do tmatuk tatuk ni ptrawah lnglungan dha, kana alang o hnang lubug tatuk kana, kiya duri ni kana yyayug o mdka saw paru bi qpringan ga mseupu tmatuk lubug tatuk suyang bhangan hnang na, tmatuk lubug tatuk o kmeaguh lupung miyah mseupu mkan suyang uqun ni mseupu rmgrig. 3-Mgagu o snalu kulaw djima, ini tduwa psmhtun miyuk,wana djiyun miyuk mnsa mdkrang mnangal tunux ni tmgiyal miyah dhuq alang, mqaras miyuk mlatat alang ka msapuh musa smtrung msa ka kari rudan sbiyaw. 4-Qcinuh ka ttmaan lubug, 4 qnawal embanah,. dmuuy snalu qhuni mdka quway sslubug, lmubug suyang bi bhangan hnang uyas Truku sbiyaw. Qrasun bi kana ptasan tgska ni tgbilaq gaga alang Truku, emptgsa laqi o dmudug bi dduuy lubug Truku tmgsa uyas Truku sbiyaw. Niqan tru klgan ka pusu lubug seejiq Truku sbiyaw, qwqaw, tatuk ni pgagu.Qwqaw seejiq Truku o aji wana djiyun euda mqaras, rgrig, djiyun quri lubug meysa uri. Rsrisawni wauwa ga, ngalan dha qngqaya pprngaw ka qowqaw nii, rmirih kari, rmuus pgkla lnglungan, yaasa seejiq Truku sbiyaw o, murug bi gaya tnegsa rudan, ini tduwa hmut mslupang, asi ka murug lnglungan tama ni bubu.Tatuk seejiq Truku o djiyun tmaus lplupung ni ltlutut iyah mseupu mkan suyang uqun aji uri o mkan pntryian, rgrig ni smqaras hyaan nanak. Alang seejiq Truku sbiyaw o niqan tatuk kana ka kngkingal ruwan sapah, pida bi smsung, babaw mnhdu qmpah ka dseejiq do, plhlah lnglungan ni tmatuk da, hnang tatuk kana ka llingay, tblnga bi ka kana ayug, mlglug lnglungan kana seejiq.Pgagu seejiq Truku o ini tduwa hmut miyuk, pida bi jiyax babaw mangal tunux hmdhik miyah sapah ka dsnaw do sriyu paah kska alang mgagu pgagu mqaras smtrung dhyaan ka Empsgasut. Mgseesu bi ka rgrig seejiq Truku sbiyaw, ki phnang meuyas do ki rmgrig uri da. Msleexan ka dapil rgrig seejiq Truku sbiyaw, dmuuy qawqaw psdahar ayus brah quwaq lmubug, murug euyas, mlglug ka hiyi, mqada narat qaqay, mstaril ka iril qaqay, mrriyux dapil mgrig. Asi ka msupu mstaril ka btriq babaw pungu ka kuyuh, ini tduwa mqaqa, snaw do asi ka mdka saw samat pskayun btriq pstaril, pqita brax qbubur snaw balay.Pteura brax ni suyang ka rgrig seejiq Truku sbiyaw, yaasa mduuy qawqaw ka dha baga, kiya ni kmpryuxan dapil qaqay kana ka pusu rgrigan, niqan ka saw murug hnigan papak pada ni hnigan papak bowyak. mlubug ni rmgrig, nasi wada mkala baraw ka lubug do, wada sbeytaw mstaril ka grig uri da, asi ka niqan bi brax kika dhuq saw ni rmgrig!Duri ni, rgrig seejiq Truku sbiyaw o, snaw ni kuyuh o psnakun mgrig, duri ni ini pduuy baga, ana yaa mseupu rmgrig o, ini tduwa tmlung kana kngkingal hiyi qbubur, qntaan ta ka dsnaw ni dkuyuh mtqiri dmuuy baga mgrig ka rgrig seejiq Truku sayang ga, ga dha maxan knkla kndsan knxalan sayang kida, aji balay bi rgrig sbiyaw kiya. Alang Truku ni Tayal ni Seejiq o ida niqan ka 4 lubug djiyun dha saw euda mqarasan jiyax.Ma saw wana 4 rey,mi,so,ra, bi ka qphangan hngan lbug o ma ungat ka do,fa,si 3 hngan,aysaw uyas rudan sbiyaw o pnaah kari na rudan nanak ni bukuy do srikaw hari mngdka saw uyas uri da.